Vestbøstadtjørna

Vestbøstadtjørna naturreservat ligg om lag 1,5 km sørvest for Fitjar sentrum i Fitjar kommune, og vart freda ved kgl.res. 15. desember 1995. Reservatet er på om lag 76 dekar og omfattar sjølve tjørnet saman med eit belte av myr og sumpmark.

Området ligg i kysttrekkruta og er særleg viktig for andefuglar. Stokkand og krikkand hekkar her, og artar som knekkand, brunnakke, toppand og kvinand er observerte. Sivhøne, sothøne og åkerrikse er òg registrerte. Vegetasjonen har velutvikla sonering med innslag av sjøsivaks, som er relativt sjeldan på Vestlandet. I tjørnet er det funne butt-tjønnaks, ein sjeldan plante på Vestlandet nord for Jæren.

Fredningsforskrifta forbyr all skade på vegetasjon og dyreliv, jakt og fangst, motorisert ferdsel på land og vatn, lågtflyging under 300 meter, camping og tiltak som kan endre dei naturlege tilhøva. Ordinær jordbruksdrift på eksisterande dyrka areal, beite og sanking av bær og matsopp er likevel tillate. Forvaltningsstyresmakta, som er Statsforvalteren i Vestland, kan gje løyve til enkelte tiltak som kontrollert rydding av vegetasjon og nødvendig grøfting av tilgrensande areal.