Hendvågen

Hendvågen naturreservat ligg vest på Henda i Averøy kommune i Møre og Romsdal. Reservatet omfattar ein grunn, nesten avstengd våg som er om lag 2 km lang, med store tidevassleirer og grunnområde. Vågen er omgjeven av strandenger og strandberg, og dominerande substrattypar er skjelsand og silt.

Området er nokså artsfattig med 49 registrerte planteartar, men er likevel interessant på grunn av store førekomstar av ulike typar salteng og forstrand, mellom anna fjøresaltgras-eng. Sjeldne samfunnstypar som saftmelde-forstrand og havbendel-grusstrand er påvist. Hendvågen er viktig beiteområde for ender og vassfugl under trekk og om vinteren, og er ein del av eit større våtmarkssystem med stor vinterbestand av songsvane. Raudlista artar som krykkje og fiskemåke er observert i området, og det er registrert fleire oterynglingar innafor reservatet.

Reservatet vart freda ved kgl.res. 27. mai 1988 med heimel i naturvernlova. Fredinga omfattar eit totalareal på om lag 1193 dekar, av dette 515 dekar sjøareal. Føremålet er å ta vare på eit viktig våtmarksområde med tilhøyrande plantesamfunn, fugleliv og anna dyreliv.

Fredingsføresegnene forbyr all skade på vegetasjon, jakt og forstyrring av vilt, motorisert ferdsel til lands og lågtflyging under 300 meter. Tiltak som kan endre dei naturgjevne tilhøva er òg forbodne. Beiting, fiske, sanking av bær og matsopp og motorferdsel i næringsøyemed er likevel tillate. Forvaltinga er lagt til Statsforvalteren i Møre og Romsdal.