Måslia

Måslia naturreservat ligg på Ørskogfjellet og dekkjer eit areal på om lag 9060 dekar fordelt på kommunane Ålesund og Vestnes i Møre og Romsdal. Reservatet vart freda ved kgl.res. 13. desember 1996.

Formålet med vernet er å ta vare på eit sjeldan stort og urørt myrområde med verdi som nasjonalt typeområde. Myrområdet er samansett av bakkemyrar og flatmyrar, delte opp av bekkar og elvar. Torvlaget er tynt, sjeldan over ein meter. Fattig myrvegetasjon på fastmatte dominerer, medan rikmyr berre er observert nord i reservatet. Interessante artar i reservatet er klokkelyng, korallrot, engmarihand, kystmyrklegg, heiblåfjør, fjelltistel og breiull.

Fredningsforskrifta forbyr all skade på vegetasjon, innføring av nye planteartar, tiltak som kan endre naturgjevne tilhøve, og motorisert ferdsel på barmark. Det er likevel høve til tradisjonell beiting, sanking av bær og matsopp, og drift av seterstølsområdet så lenge det ikkje endrar vasshusgald eller vegetasjon. Forvaltningsstyresmakta kan gje løyve til naudsynt motorferdsel i samband med stølsdrift, uttak og planting av skog på fastmark, samt nybygg knytt til stølsdrifta. Forvaltinga er lagt til Statsforvalteren i Møre og Romsdal.