Selvikvågen

Selvikvågen naturreservat ligg på Harøya i Ålesund kommune, Møre og Romsdal. Reservatet vart freda ved kongeleg resolusjon 27. mai 1988 og omfattar totalt om lag 461 dekar, der ca. 306 dekar er sjøareal.

Området er eit viktig våtmarksområde med grunn bukt, strandenger, leirer og store tidevassareal, og har ei rekke skjermande holmar utanfor. Det er registrert 87 planteartar, mellom anna bogestorr, sverdlilje og dikesvineblom. Strandengene er særs verneverdige med store homogene flater og nesten komplette soneringar av saltengtypar som er tilnærma urørte. Området er ein viktig beite- og hekkeplass for ender og vadefugl. Sidan 19. mars 1996 har området vore omfatta av Ramsarkonvensjonen, som sikrar internasjonalt viktige våtmarkssystem.

Føremålet med fredinga er å ta vare på våtmarksområdet med tilhøyrande plantesamfunn, fugleliv og anna dyreliv. Verneforskrifta forbyr mellom anna all skade på vegetasjon, jakt og fangst, motorisert ferdsel til lands, lågtflyging under 300 meter, camping og inngrep som kan endre dei naturgjevne tilhøva. Slått, beiting og etablert jordbruksdrift er likevel tillate, det same gjeld fiske etter gjeldande reglar. Forvaltningsmyndigheit er Statsforvalteren i Møre og Romsdal.