Smokkevatnet

Smokkevatnet naturreservat ligg i Time kommune i Rogaland og vart freda ved kongeleg resolusjon 20. desember 1996. Reservatet dekkjer eit totalareal på om lag 237 dekar, der om lag 145 dekar er landareal og 92 dekar er vatn. Området har internasjonal status som Ramsarområde og er eit av dei viktigaste våtmarksområda på Jæren.

Smokkevatnet er ein grunn, næringsrik kulturlandskapssjø med stor naturverdi. Det er registrert 17 ulike vegetasjonstypar, mellom anna fleire raudlista typar som rik langskotsvegetasjon og rikstorrsump. Av dei 214 registrerte karplantane er seks raudlista, mellom anna granntjønnaks og nikkebrønsle. Fuglelivet er rikt, og per 2011 var 161 artar registrerte i reservatet, der 38 stod på raudlista. Området er viktig som hekke-, raste- og overvintringslokalitet for våtmarksfuglar.

Ifølgje verneforskriften er all vegetasjon og alt dyreliv freda mot skade og øydelegging. Jakt, fangst og bruk av skytevåpen er forbode, og hundar skal haldast i band. Motorisert ferdsel på land og vatn er forbode, det same gjeld camping og oppsetting av telt. Det er heller ikkje tillate å gjennomføre tiltak som kan endre naturmiljøet, som drenering, oppfylling, gjødsling eller bruk av kjemiske middel. Tradisjonell beiting og fiske er likevel tillate. Forvaltningsansvaret ligg hos Statsforvaltaren i Rogaland.