Grannesbukta

Grannesbukta naturreservat ligg heilt aust i Hafrsfjord, på Grannes i Sola kommune i Rogaland. Reservatet vart freda ved kongeleg resolusjon 20. desember 1996 og dekkjer eit areal på om lag 63 dekar, der om lag 51 dekar er sjøareal.

Området er eit viktig marint gruntvassområde med store, langgrunne mudderflater, stadvis med sand, grus og stein. Her finn ein ålegrasenger og undervassenger, salteng, brakkvasseng og brakkvassump med takrøyr. Hafrsfjord er eit internasjonalt viktig raste- og overvintringsområde for våtmarksfugl, og har status som Ramsarområde. Mudderflatene er særleg viktige for trekkande vadefuglar som myrsnipe, gluttsnipe og lappspove, og for andefuglar som gravand, sjøorre og ærfugl. I strandvegetasjonen veks raudlistearten flikmelde (EN), og dei sjeldne artane haustengkall og knortestorr.

Føremålet med fredinga er å ta vare på eit marint våtmarksområde med naturleg tilhøyrande vegetasjon og dyreliv. Fredingsforskrifta forbyr all skade på vegetasjon og dyreliv, innføring av nye plante- og dyreartar, motorisert ferdsel til lands og til vanns, lågtflyging under 300 meter, camping og tiltak som kan endre dei naturgjevne tilhøva. Tradisjonelt beite og fangst av villmink er likevel tillate. Forvaltningsmyndigheit er Statsforvaltaren i Rogaland.