Barlindflaten

Barlindflaten naturreservat ligg i den bratte, sørvendte lia ovanfor Ålvik i Kvam kommune, på nordsida av Hardangerfjorden. Reservatet dekkjer eit areal på om lag 442 dekar og vart freda ved kongeleg resolusjon 13. oktober 2000.

Området har ein uvanleg stor bestand av barlind med mange storvaksne tre, noko som er særleg påfallande så langt aust som dette. Barlind finst regelmessig over heile området opp til 250 meter over havet, og fleire stader dannar treslaget tette bestandar under kronedekket av furu og bjørk. Totalbestanden vart i 2001 rekna til om lag 500 tre høgare enn 0,5 meter. Lokaliteten har stor vitskapleg verdi. Alt i 1932 vart fire barlindar i området freda.

Føremålet med fredinga er å sikre eit naturmiljø med ein stor barlindbestand av storvaksne tre i eit område med stor høgdeforskjell.

Verneforskrifta forbyr mellom anna skade på vegetasjon og dyreliv, innføring av nye planteartar, fysiske inngrep og motorisert ferdsel. Sanking av bær og matsopp, jakt, fiske og tradisjonell beiting er likevel tillate. Det er òg høve til å ta ut innplanta gran og andre ikkje-heimlege treslag i samsvar med godkjend skjøtselsplan. Forvaltningsstyresmakta kan gje dispensasjon for vitskaplege undersøkingar og tiltak av vesentleg samfunnsmessig verdi.