Bjellandsvatnet

Bjellandsvatnet naturreservat ligg ca. 36 moh. i Sveio kommune i Vestland, rett ved riksvegen om lag 2 km nordaust for Sveio sentrum. Reservatet dekkjer eit areal på om lag 160 dekar og vart freda ved kgl.res. 15. desember 1995.

Vatnet er svært næringsrikt og omkransa av jordbrukslandskap med dyrkamark og beite. Den sørlege delen har eit velutvikla takrøyrbelte og vegetasjon av flaskestarr og elvesnelle, medan dei opne partia har frodig undervass- og flytebladvegetasjon, særleg tjønnaks. Området er eit viktig hekke- og rasteområde for ei rekkje fugleartar, mellom anna stokkand, krikkand, brunnakke og toppand. Songsvane rastar her om vinteren, og sjeldne artar som horndykkar, dvergdykkar, snadderand og knekkand er observert. Horndykkaren har hekka i vatnet. Sivsongar og sivsporv hekkar ved vatnet, og beite- og dyrkamarka rundt er viktig for artar som storspove, tjeld, vipe og enkeltbekkasin.

Fredningsforskrifta forbyr all skade på vegetasjon og dyreliv, jakt og fangst, motorisert ferdsel på land og vatn, lågtflyging under 300 m, camping og tiltak som kan endre dei naturlege tilhøva. Ordinært landbruk, beite, fiske og sanking av bær og matsopp er likevel tillate. Forvaltningsstyresmakta kan gje løyve til mellom anna felling av vilt som gjer vesentleg skade og rydding av vegetasjon i samsvar med godkjent forvaltningsplan.